OPUT'E TANUN

Oncirez gopk'un3xi do pçume...

3alendo na gülun ğalişi nena tamo tamo mulun uci çkimişe.

Miti mot gok'un3xaz ya do heşo uneneli nulun zuğaşe k'ele.

Ğaliz jindole na ren cameşi xoca pçume mati...

Hah!..

Ezani ik'itxoms.. Ha3i kebiseli... Oxorişi didi nek'na ko gom3k'i...

Çkun coğorik ma m3iruşi me3uk'ap'uş mo3uk'ap'uşe ko gâçk'u.... Nak'o k'ay da3onen... Mundez ebiselare kuçkin do nek'naşi k'ap'ulaz ma mçumes.

Oxor çkuniz 3kari gale miğunan... Oxoşe va amabiğit. Namazişe ebiselatşi mjora elan cans.. Hemuşeni te ivaz ma do galen nek'naşi ampuliz mebun3am..

Mendras, rak'anepeşi dudiz a ç'ut'a mjoraşi te i3iren ala dido ç'ut'a..

Abdesi kep'ç'opi... Coğori çkunik olaluş ko gâçk'u... Mkyapupe renan steri... Txerepunas muntxanepe gulunan.. Ko bogni do mendebo3k'edi ala mutu va ma3iru... Aç'ut'ati maşkuyinu.. Mkyapu ma bzop'on ala ğecepeti gulunan... Mtutepe dido va mulunan ala hentepekti lumci ivaşi gulunan... M3xulepeş oraz gulunan do na dibğen m3xulepe ipxornan.

Kamapti, namazi çkimi dop'i...

Kinçepek oçanduz ko gâçkes...

Mjorak mobulu ya do mendra rak'anepeşe te muşi ogzalu doren.

Otoleşen bi3k'er ha mskfa k'ianas.

K'inçepez ko man3inez... 3anak oxoş tude, ma na b3iraye steri komoxtu... Hek gelaxen do ma mo3ken! Mupe mskfa şeyi ren Ğormot'i çkimi...

Çayepe i3iren.. Txerepunape i3iren...

Mjora kextu do oxor çkunisti ko geçu...

Haşo mskfa oput'eşen gamabulut do k'oçi na mağodenan didi noğapeşe bulut. Ncixapeşe amabulut do pskidamt bzop'ont!

Çku mu bikomt?..

Va miçkin!..😔

İlhan ASILKAZANCI 2019.02.06 Gebze