JU CUMA




3oxle a kçini do a badiz ju biç’i bee davez. Çuç'utak didiz uğençumt’u .Didik mutu va ikomt’u. Ala heti bee t’u. Va geçamt’u do numxvacumt’u. Çuç'ut’ak a şvaci nana do baba muşişe ulut’u do didi cumamuşi ok’ut’alamt’u. Didik “ ma mutu va boğodi. “ zop’ont’u ala Cuma muşik heşo ibga t’u ki, nana do baba muşik ç’uç'ut’az p’iciz xe usumet’ez do didiz iyya geçamt’ez.




Na ciomtepek u3umet’ez, “ Didik mutu va oğodamz,ç’uç'ut’ak naçkin, didik geçaz na ç’uç'ut’a heşo komaleni? Ala xoloti didik geçama ipxot’u.




3anape heşo golilu, igzalu. Beepe dirdez. Ala xolo ç’uç'utak didiz noçkint’u. Ç’uç'ut’aşi ğnosi heşo k’ele içalişamt’u. Oxoyişi ç’uç'ut’i heya t’u. Hemuz mutu va u3umet’ez. Hemukti didi Cuma muşişe geçama oç’k’omamt’u. Ok’uleti nek’naz geyide icic’umt’u.




Ora golilu igzalu. Ç’uç’ut’a dirdu. Ğnosi ti “ na uçkint’u steyi “ irdu. Didi Cuma muşiz xolo “ nunçaminz!” Ala nana muşiz didi Cuma muşiz va gyaçen. Xfala uğarğalamz. Nana muşik ç’uç’ut’a bee muşik na zop’onpe “ isa uçkin “




Ç’uç'ut’az marte ti va duskidu. Na tku m3udepete, na moxerdinu marte muşepek ti ko nisamadez. Ç’uç'ut’a “diçinez “ Xfala ko doskidu. Na tku m3udepe ignapu şkule hemu k’ala miti va goxtu, va doxedu. Xfala ko doskidu.

Ala diğnosauyi? Va.




Ha na meboç’aepe dogak’itxez na, nisamadit. Hakoni nana do baba steyi mot ikomt. O3k’edit, iduşunit, ognit. Ala didiz ti, ç’ut’azti mot geçamt. Geçama isa mutu vaen.

KEMAL ÖZBIYIK